Maios

O día 30 de abril pola mañá o CEIP de Ponte Sampaio festexou a festa dos maios; para tal fin estivemos falando no centro de en que consiste esta celebración, cal é a súa orixe e o seu significado.

Logo de coñecermos a tradición dos maios en Galicia procedemos a elaborar o noso maio e as nosas coplas. 

Todo o alumnado do centro participou na elaboración das cantigas e no deseño da estrutura e coroa do maio, logo diso pedimos a colaboración das familias para que nos achegasen fiúncho, flores, ovos... e estivemos decorando o noso maio durante as primeiras horas da xornada e despois cantamos as nosas coplas arredor do maio, cada curso preparou as súas propias coplas e logo todos xuntos cantámolas.

A festa dos Maios, tamén coñecida simplemente como os Maios, é unha festa popular de orixes ancestrais. As orixes da festa remóntanse ás antigas civilizacións prerromanas, como a celta. Esta celebración primaveral adóitase celebrar o 1 de maio pero nós tivemos que adiantala un día e tiña antiguamente conconnotacións rituais totémicas á divindade primaveral ou das árbores, que se foron perdendo co paso do tempo. 

A festa consiste en realizar diversas representacións ao redor dunha árbore ou escultura, chamada maio e grupos de nenos/as cantan coplas populares (que tamén reciben a denominación de maios), ás veces dialogadas, mentres camiñan arredor da escultura, acompañados da percusión de dous paus. 

O noso maio consistía nunha armazón de paus de forma cónica, recuberta de tea metálica, que se cubriu de fiúncho. Sobre esta estrutura debuxáronse distintos motivos con flores, follas, fiúncho, fentos,, froitos ou mesmo ovos. O cumio (coroouse cunhas flores. 

Neste actividade participaron todos os nenos/as do cole e o profesorado, e contou coa axuda inestimable das familias e do noso conserxe. 

Este é o primeiro ano que realizamos esta celebración na nosa escola, pero de seguro que non será a única porque foi unha experiencia moi enriquecedora para todo o alumnado. 

Estas son algunhas das coplas que elaborou o noso alumnado: 

HOXE AQUÍ EN PONTE SAMPAIO 

IMOS TODOS CELEBRAR 

QUE CHEGOU O MES DE MAIO 

VEN CONNOSCO A CANTAR.

TEMOS UNHA XOANIÑA 

ELA VIUNOS A CONTAR 

QUE A NATUREZA ESTÁ ENFERMA 

E A TEMOS QUE COIDAR. 

OS INCENDIOS DESTE ANO 

AÍNDA SE ESTÁN A SUFRIR 

NON ESCOITO OS PAXARIÑOS 

QUE PIABAN POR AÍ. 

QUEREMOS CO NOSO MAIO 

AO MUNDO AGASALLAR 

E CO RITMO QUE TRAEMOS 

AOS ANIMAIS ESPERTAR.

E ademais fomos noticia.